कहिलेकाहीँ तिम्रा यादहरु
अनौठै गहिरो लाग्न थाल्छन्
बिना सोधपुछ आइपुग्छन्
धुवाँजस्तै
ओताईदिन्छन् चुपचाप
कहिले सताउँछन्
कहिले बताउँछन्
फेरि कहिले तीनै सपनाहरूले
हल्का उडाउँछन्
सवारी दिन्छन् तारामाथि
गुन्जाउँछन् मधुर सङ्गीत
र उज्यालो बनाइदिन्छन् यात्रा
फेरि कहिले तिनै यादहरु
जुरुक्क उचाल्छन्
सवार गराउॅंछन् बादल माथि
बजाउॅंछन् सुमधुर धुनहरु
र उत्सब बनाईदिन्छन् जिन्दगी,
त्यसैले म कन्फ्युज्ड हुन्छु,
के तिम्रा यादहरु
रंगिन छन्
या त श्यामश्वेत?
