मनमा छन्
र त
छुट्छन् कि भन्ने डर छ।
डर छ- छुट्छन् कि भन्ने
र त मनमा छन्।
मन अमन नहुन्जेल
यतै बसिराखुन् बसेकाहरु
के’था!
कुनै दिन
बसेकाहरुसँग नै डर पलाओस्
र दिक्क मानोस् मन पनि
मनसँगै बेमन भएर।
र ठानोस्
एउटा मुक्ति.. उन्मुक्ति..
यादमा छन्
र त
बिर्सिन्छन् कि भन्ने डर छ।
डर छ- बिर्सिन्छन् कि भन्ने
र त यादमा छन्।
याद बिर्सना नहुन्जेल
यतै बसिराखुन् सम्झेकाहरु
के’था!
कुनै दिन
सम्झेकाहरुसँग नै डर पलाओस्
र दिक्क मानोस् मन पनि
मनसँगै बेमन भएर।
र ठानोस्
एउटा मुक्ति.. उन्मुक्ति..
र सायद
त्यो दिन
न डर रहनेछ
न याद..
र सायद
त्यो दिन
न डर रहनेछ
न मन..
